Një tërmet me magnitudë 6.3 ballë goditi të premten Gadishullin Kamchatka në Lindjen e Largët të Rusisë, duke qenë lëkundja më e fundit në një seri aktivitetesh sizmike të regjistruara në rajon.
Sipas degës rajonale të Shërbimit të Unifikuar Gjeofizik të Akademisë Ruse të Shkencave, tërmeti u regjistrua në një thellësi prej 15.4 kilometrash.
Epiqendra e tij u lokalizua rreth 183 kilometra larg qytetit Petropavlovsk-Kamchatsky, qendra administrative e rajonit Kamchatka. Lëkundjet u ndjenë edhe në këtë qytet portual.
Pak më herët, në brigjet e Kamchatka-s ishte regjistruar edhe një tërmet me magnitudë 5.6 ballë. Sipas autoriteteve, megjithëse kishte magnitudë më të ulët, ai u ndje më fort në disa zona të banuara.
Deri më tani nuk ka raportime për viktima apo dëme materiale.