Një ngjarje tragjike ka tronditur qytetin e Billings, Montana, në SHBA, ku një 44-vjeçar dyshohet se vrau tetë anëtarë të familjes së tij, mes tyre edhe katër fëmijë, përpara se banesa të përfshihej nga zjarri.
Policia u thirr në adresën e familjes pas raportimeve për të shtëna me armë. Kur mbërritën në vendngjarje, efektivët dëgjuan të shtëna që vinin nga pjesa e pasme e banesës. Pak më vonë, ndërtesa u përfshi nga flakët.
I dyshuari, Alan Smith, kishte jetuar prej vitesh me prindërit e tij. Sipas familjarëve, ata i kishin kërkuar të largohej nga banesa disa javë përpara ngjarjes. Megjithatë, Smith u rikthye të dielën, në një kohë kur familja ishte mbledhur për darkën e tyre të zakonshme javore.
Mes viktimave janë identifikuar Owen Ireland, 13 vjeç, Chloe Ireland, 7 vjeç, Landon Ghekiere, 15 vjeç dhe Charlotte Ghekiere, 12 vjeç.
Sipas autoriteteve, viktimat i përkisnin katër brezave të së njëjtës familje. Mes tyre ishte edhe një grua në të 90-at, e cila përdorte karrocë me rrota, ndërsa viktima më e re ishte vetëm 7 vjeçe.
Hetuesit konfirmuan se tetë persona humbën jetën dhe bënë të ditur se Smith dyshohet se ka qëlluar edhe veten. Zjarri që përfshiu banesën e shkatërroi atë në masë të madhe, duke e komplikuar ndjeshëm punën e ekipeve hetimore.
Zjarrfikësit vijuan ndërhyrjen për shuarjen e flakëve deri rreth orës 1:00 të mëngjesit të së hënës, ndërsa autoritetet nisën hetimet për zbardhjen e plotë të rrethanave të ngjarjes.
Familjarët e kanë cilësuar Charlotte Ghekiere si heroinë, pasi sipas tyre ajo arriti të telefononte numrin e emergjencës 911 dhe u përpoq të kërkonte ndihmë për pjesëtarët e familjes.
Familja kishte origjinë nga zona e Seattle dhe ishte zhvendosur në Montana disa vite më parë. Të afërmit e përshkruan Smith si një person të tërhequr, i cili kalonte pjesën më të madhe të kohës në dhomën e tij përpara kompjuterit.