Tragjedi në portin e Pireut: Tre anëtarë të së njëjtës familje humbin jetën pasi vetura bie në det
Një ngjarje tragjike është regjistruar mbrëmjen e kaluar në portin e Pireut, në Greqi, ku tre anëtarë të së njëjtës familje kanë humbur jetën pasi automjeti me të cilin udhëtonin përfundoi në det, raportojnë mediat greke.
Viktimat janë një 45-vjeçar dhe prindërit e tij, përkatësisht 82 dhe 72 vjeç.
Aksidenti ndodhi pranë hyrjes E2 të portit të Pireut, ndërsa shkaqet dhe rrethanat e plota të ngjarjes mbeten ende të paqarta.
Sipas raportimeve paraprake, ekipet e shpëtimit arritën fillimisht të nxirrnin nga deti trupin e 45-vjeçarit. Ndërkohë, dy prindërit e tij kishin mbetur të bllokuar brenda automjetit. Pas kërkimeve, zhytësit arritën të nxirrnin edhe trupat e tyre.
Dyshimet e para sugjerojnë se automjeti drejtohej nga babai 82-vjeçar, i cili mund të ketë humbur kontrollin mbi timonin për shkak të kushteve të pafavorshme atmosferike. Para aksidentit, zona e Pireut ishte përfshirë nga reshje të dendura shiu.
Megjithatë, deri më tani nuk ka një konfirmim zyrtar për shkakun e aksidentit, ndërsa autoritetet po hetojnë për të zbardhur plotësisht ngjarjen.
Në operacionin e kërkim-shpëtimit morën pjesë pjesëtarë të Rojës Bregdetare greke, një ekip i specializuar zhytësish, mjete lundruese private, si dhe një anije e shërbimit të pilotimit të anijeve.
Hetimet vijojnë për të përcaktuar rrethanat që çuan në këtë tragjedi, e cila u mori jetën tre personave të së njëjtës familje.