Katër të vrarë në një sulm me armë në Kolumbi, mes viktimave edhe një zyrtar vendor
Katër persona, përfshirë një zyrtar të zgjedhur vendor, u vranë në orët e para të së dielës në qytetin Cucuta, në verilindje të Kolumbisë, bëjnë të ditur autoritetet lokale.
Sipas policisë, ngjarja ndodhi rreth orës 02:00, kur dy persona të armatosur që lëviznin me motoçikletë hapën zjarr ndaj një grupi qytetarësh në një lokal, ku ata po konsumonin pije. Si pasojë e sulmit, katër persona humbën jetën në vend.
“Fatkeqësisht, konfirmojmë vdekjen e katër personave,” deklaroi zëvendësshefi i policisë, Ricardo Conte.
Ky incident vjen në një periudhë kur Kolumbia po përballet me një përkeqësim të ndjeshëm të situatës së sigurisë, që sipas autoriteteve është më i rëndi në dhjetë vitet e fundit. Dhuna lidhet kryesisht me aktivitetin e grupeve të armatosura, guerilëve dhe organizatave kriminale të përfshira në trafikun e drogës.
Sipas Institutit për Zhvillim dhe Studime të Paqes, që nga fillimi i vitit janë vrarë të paktën 53 liderë socialë dhe zyrtarë vendorë në vend.
Përshkallëzimi i dhunës vjen në prag të raundit të parë të zgjedhjeve presidenciale, që do të mbahen më 31 maj, në një klimë të tensionuar pas dekadash konflikti të brendshëm.
Be First to Comment