Policia paralajmëron qytetarët: Kujdes nga SMS-të mashtruese që synojnë vjedhjen e të dhënave bankare

Policia e Shtetit ka ngritur alarmin për një valë të re mesazhesh mashtruese që po qarkullojnë në telefonat e qytetarëve, me qëllim vjedhjen e të dhënave personale dhe financiare.

Sipas Drejtorisë për Hetimin e Krimeve Kibernetike, mesazhet paraqiten në mënyrë të rreme si njoftime nga kompani postare për dorëzimin e pakove dhe përmbajnë lidhje të dyshimta që u kërkojnë qytetarëve të ndërmarrin veprime urgjente.

Autoritetet bëjnë të ditur se qëllimi i këtyre mesazheve është:

• Përvetësimi i të dhënave personale;
• Vjedhja e informacionit bankar;
• Aksesi i paautorizuar në llogaritë financiare të qytetarëve.

Drejtoria për Hetimin e Krimeve Kibernetike thekson se bëhet fjalë për tentativa mashtrimi dhe u kërkon qytetarëve të tregojnë kujdes maksimal.

Çfarë duhet të bëni?

• Mos klikoni në lidhje (linke) të dërguara nga numra të panjohur;
• Mos jepni të dhëna personale apo bankare;
• Mos ndiqni udhëzime që kërkojnë veprime urgjente pa i verifikuar më parë.

Rekomandimet e Policisë

• Fshini menjëherë mesazhe të tilla;
• Mos ndërveproni me përmbajtjen e tyre;
• Raportoni çdo rast të dyshimtë pranë autoriteteve kompetente.

Policia e Shtetit thekson se mbetet e angazhuar në identifikimin dhe goditjen e skemave mashtruese në internet, me qëllim mbrojtjen e qytetarëve dhe rritjen e sigurisë digjitale në vend.