Shoqata Kombëtare e Transportit Qytetas dhe Shoqata e Transportit Urban dhe Interurban kanë njoftuar se, duke nisur nga nesër, do të reduktojnë me 40% numrin e mjeteve në qarkullim në . Ky vendim vjen si pasojë e mungesës së masave mbështetëse nga institucionet përgjegjëse.
Sipas përfaqësuesve të sektorit, pavarësisht problematikave të ngritura prej javësh dhe një takimi të zhvilluar më 1 prill 2026, deri më tani nuk është ndërmarrë asnjë hap konkret për përballimin e situatës. Ata theksojnë se nuk është miratuar asnjë skemë kompensimi për rritjen e çmimit të karburantit, ndërsa mungon edhe një plan i qartë për lehtësimin e barrës financiare.
Gjithashtu, sipas tyre, nuk ka asnjë afat konkret për ndërhyrje dhe nuk ka nisur asnjë proces për rishikimin e elementeve fiskale që ndikojnë drejtpërdrejt në kostot e operatorëve, si akciza, taksa e qarkullimit dhe TVSH-ja.
Shoqatat e konsiderojnë këtë vendim si të detyruar, për shkak të përkeqësimit të situatës financiare, e cila e bën gjithnjë e më të vështirë vazhdimin normal të aktivitetit. Për këtë arsye, reduktimi i flotës shihet si një masë emergjente për përballimin e kostove.
Operatorët u bëjnë thirrje qytetarëve për mirëkuptim dhe i këshillojnë të planifikojnë më mirë lëvizjet e tyre, duke paralajmëruar për vonesa dhe vështirësi në transportin publik.
Në të njëjtën kohë, ata theksojnë se mbeten të hapur për dialog dhe bashkëpunim me institucionet, por kërkojnë ndërhyrje të menjëhershme dhe efektive për të shmangur përkeqësimin e mëtejshëm të situatës.