Mjekë dhe infermierë nga Kosova do të trajnohen në Turqi, marrëveshje pesëvjeçare me Universitetin e Trakisë
Profesionistët shëndetësorë nga Kosova do të kenë mundësi të zhvillojnë trajnime profesionale në Universitetin e Trakisë në Turqi, pas nënshkrimit të një marrëveshjeje pesëvjeçare me Ministrinë e Shëndetësisë së Kosovës.
Marrëveshja është pjesë e projektit “Urat e vëllazërisë” dhe synon forcimin e bashkëpunimit në fushën e shëndetësisë, përmes shkëmbimit të njohurive, përvojave dhe praktikave profesionale. Qëllimi është gjithashtu rritja e kapaciteteve të personelit shëndetësor dhe përmirësimi i shërbimeve mjekësore në Kosovë.
Protokolli i bashkëpunimit u nënshkrua nga zëvendëskryeministri i Kosovës, Fikrim Damka, dhe rektori i Universitetit të Trakisë, Mustafa Hatipler, gjatë një ceremonie të zhvilluar në Qendrën e Kongreseve të Ballkanit.
Zëvendësrektori dhe dekani i Fakultetit të Mjekësisë, Sedat Üstündağ, bëri të ditur se profesionistëve nga Kosova do t’u mundësohen trajnime si teorike, ashtu edhe praktike, duke shfrytëzuar infrastrukturën dhe kapacitetet akademike e shëndetësore të universitetit.
Damka vlerësoi se marrëveshja do të krijojë mundësi konkrete për zhvillimin profesional të mjekëve, infermierëve, specialistëve dhe stafit akademik nga Kosova. Sipas tij, përvoja e Universitetit të Trakisë mund të kontribuojë në forcimin e mëtejshëm të sistemit shëndetësor kosovar.
Nga ana tjetër, rektori Mustafa Hatipler deklaroi se universiteti është i gatshëm të ndajë me profesionistët kosovarë njohuritë, përvojën dhe kapacitetet e tij në sektorin e shëndetësisë. Ai e cilësoi marrëveshjen si pjesë të bashkëpunimit më të gjerë me vendet e Ballkanit.
Edhe dr. Ardian Shefkiu, nga Shërbimi Spitalor dhe Klinik Universitar i Kosovës, tha se kjo nismë pritet të ndikojë në rritjen e aftësive profesionale të punonjësve shëndetësorë dhe në përmirësimin e shërbimeve të ofruara për pacientët.
Guvernatori i Edirnes, Yunus Sezer, shprehu gjithashtu interesin që një bashkëpunim i tillë të zgjerohet edhe në vende të tjera të Ballkanit, përfshirë Bullgarinë dhe Maqedoninë e Veriut.
Në ceremoninë e nënshkrimit ishte i pranishëm edhe konsulli i përgjithshëm i Kosovës në Stamboll, Dren Zeka. Pas ceremonisë, delegacioni nga Kosova vizitoi Shërbimin e Urgjencës në Spitalin e Universitetit të Trakisë, ku aktualisht po zhvillohen punime rinovimi dhe përforcimi të ambienteve.