Paraditen e 21 prillit, një ngjarje e rëndë tronditi opinionin publik, pasi u raportua se varri i një gruaje, e ndarë nga jeta prej 17 vitesh, ishte dëmtuar. Fillimisht dyshimet ranë mbi një vjedhje të mundshme të eshtrave, por hetimet e mëvonshme e përjashtuan këtë pistë.
Në lidhje me rastin, policia shoqëroi në komisariat Edison Ngrecin, 36 vjeç, i cili u raportua në media si personi që kishte gërmuar varrin. Po ashtu, në disa media u përhapën pretendime se ai kishte qenë nxënës ekselent dhe se vuante nga probleme të shëndetit mendor.
Për të sqaruar situatën, vëllai i tij, i cili jeton në Berlin, ka ardhur në Shqipëri dhe ka dhënë versionin e familjes, në një intervistë për gazetarin Blendi Fevziu. Ai mohoi kategorikisht pretendimet se vëllai i tij ka pranuar autorësinë e ngjarjes.
Sipas tij, 36-vjeçari është shoqëruar nga policia vetëm për verifikim dhe ka qëndruar në komisariat nga ora 10:30 deri në 17:10, pa qenë në paraburgim dhe pa praninë e një avokati. Ai shton se, pas marrjes në pyetje, policia është bindur se vëllai i tij nuk ka lidhje me ngjarjen.
“Vëllai im nuk ka pranuar asgjë dhe nuk është i përfshirë në këtë rast. Kam kontaktuar vetë me policinë dhe më kanë konfirmuar se është marrë vetëm për verifikim,” u shpreh ai.
Vëllai i Edison Ngrecit pranoi se 36-vjeçari ka pasur shqetësime psikologjike në të kaluarën, por theksoi se ato janë trajtuar dhe aktualisht ai bën një jetë normale. Ai ka punuar sezonalisht, madje edhe si ndihmës kuzhinier në Gjermani.
Sipas tij, arsyeja pse emri i vëllait u përfshi në këtë histori lidhet me faktin se ai frekuenton shpesh varrin e nënës, ku kalon edhe orë të gjata. Megjithatë, ai theksoi se, pavarësisht disa mosmarrëveshjeve të vogla me punonjësit për mirëmbajtjen, vëllai i tij nuk ka dëmtuar asnjëherë varre.
Në përfundim, ai kërkoi që e vërteta të zbardhet nga hetimet dhe të mos hidhen akuza të pabazuara.