ZBULIMI QË MUND TË NDRYSHOJË HISTORINË/ Shkencëtarët zbulojnë sekretin e ndërtimit të piramidave
Piramidat e Egjiptit kanë magjepsur njerëzimin për mijëra vjet dhe mënyra se si u ndërtuan këto monumente gjigante vazhdon të jetë një nga misteret më të mëdha të historisë.
Piramida e Madhe e Gizës, një prej Shtatë Mrekullive të Botës së Lashtë, është ndër strukturat që kanë ngritur më shumë pikëpyetje. Si mundën ndërtuesit e lashtë të transportonin dhe vendosnin miliona blloqe guri, disa prej të cilëve peshonin disa tonë?
Një studim i ri mund të japë një pjesë të rëndësishme të përgjigjes.
Studiues nga Universiteti i Karolinës së Veriut në Wilmington analizuan imazhe satelitore radarike, të dhëna gjeofizike dhe mostra të thella të tokës për të rindërtuar peizazhin e lashtë të Luginës së Nilit.
Hulumtimi çoi në zbulimin e gjurmëve të një dege të lashtë të lumit, e cila sot është e mbuluar nga shkretëtira. Kjo rrugë ujore, e quajtur Dega Ahramat, besohet se ka kaluar pranë një numri të madh piramidash.
Sipas studiuesve, prania e kësaj dege të Nilit mund të shpjegojë se si egjiptianët e lashtë transportonin materialet e rënda drejt zonave ku ndërtoheshin piramidat. Në vend që të përballeshin vetëm me transportin tokësor nëpër terrene të vështira, ndërtuesit mund të kenë shfrytëzuar rrjetin ujor për të lëvizur gurët.
Profesor Eman Ghoneim, një nga autorët e studimit, ka theksuar se deri tani nuk dihej me saktësi vendndodhja, forma, madhësia apo afërsia e kësaj dege të lashtë me piramidat që ekzistojnë sot.
Piramidat e këtij rajoni u ndërtuan rreth 3,700 deri në 4,700 vjet më parë, në një periudhë kur kjo degë e lumit ishte ende aktive. Me kalimin e mijëvjeçarëve, ajo u zhduk dhe u mbulua nga sedimentet dhe shkretëtira.
Zbulimi mund të ketë rëndësi të madhe edhe për kërkimet e ardhshme. Nëse përgjatë brigjeve të kësaj rruge ujore ka pasur vendbanime, struktura ose objekte të tjera, studiuesit shpresojnë se gjurmët e tyre mund të gjenden nën tokë.
Kështu, rrjetet e lashta ujore të Nilit jo vetëm që mund të ndihmojnë në shpjegimin e mënyrës së transportit të materialeve, por edhe të japin të dhëna të reja për mënyrën se si jetonin dhe lëviznin njerëzit në Egjiptin e lashtë.