Gjermania po forcon përgatitjet për skenarë të mundshëm të një konflikti të gjerë në Evropë, ndërsa shefi i ushtrisë gjermane, gjenerali Carsten Breuer, ka theksuar se mbrojtja e vendit nuk mund të mbështetet vetëm te ushtria dhe armatimi.
Duke folur në Samitin e Mbrojtjes të IISS në Pragë, Breuer tha se përgatitjet duhet të përfshijnë një pjesë të gjerë të shoqërisë gjermane. Sipas tij, industria, infrastruktura, institucionet civile dhe qytetarët duhet të jenë pjesë e planifikimit për çdo situatë të mundshme sigurie.
Në fjalën e tij, gjenerali u ndal edhe te zhvillimi i shpejtë i teknologjisë ushtarake dhe ndryshimi i mënyrës se si zhvillohen konfliktet. Ai argumentoi se ushtritë perëndimore duhet të nxjerrin mësime nga lufta në Ukrainë, duke marrë parasysh edhe faktin se Rusia po përshtat taktikat dhe teknologjitë e saj.
“Rusia mëson. Ata imitojnë dhe përshtaten”, deklaroi Breuer, duke nënvizuar se avantazhi teknologjik i një pale nuk mund të konsiderohet i përhershëm.
Pas nisjes së pushtimit rus të Ukrainës, Gjermania ka ndryshuar ndjeshëm qasjen ndaj politikës së mbrojtjes. Në strategjinë e saj të sigurisë, Rusia konsiderohet si kërcënimi kryesor për sigurinë evropiane, ndërsa Berlini po punon për rritjen e kapaciteteve të Bundeswehr-it, përfshirë numrin e trupave aktive dhe rezervistëve.
Breuer ka deklaruar gjithashtu se Rusia mund të ketë deri në vitin 2029 kapacitetet e nevojshme për të ndërmarrë një sulm të madh konvencional ndaj territorit të NATO-s. Ai ka bërë të qartë se ky vlerësim lidhet me kapacitetet që Moska mund të ndërtojë dhe nuk përbën një parashikim se një sulm i tillë do të ndodhë.
Në rast të një konflikti të gjerë, Gjermania pritet të ketë një rol të rëndësishëm logjistik brenda NATO-s. Sipas planit “Operationsplan Deutschland”, territori gjerman duhet të jetë në gjendje të përballojë lëvizjen e forcave aleate drejt krahut lindor të NATO-s. Në një periudhë prej gjashtë muajsh, plani parashikon mundësinë e transportimit të deri në 800 mijë trupave dhe 200 mijë automjeteve.
Për këtë arsye, autoritetet gjermane e konsiderojnë përgatitjen një proces që shkon përtej forcimit të ushtrisë. Infrastrukturat rrugore dhe hekurudhore, kompanitë private, institucionet publike dhe strukturat civile duhet të jenë të përgatitura për të mbështetur operacionet në një situatë të jashtëzakonshme.
De