Fshati në Brazil ku gratë kërkojnë burra beqarë: Ja historia e pazakontë që po tërheq vëmendjen!
Noiva do Cordeiro është një fshat në Brazilin jugor, i cili është bërë i njohur për një histori të veçantë. Sipas rrëfimeve, aty jetojnë kryesisht gra, ndërsa mungesa e burrave beqarë ka bërë që vajzat e reja të nisin një apel për të gjetur partnerë.
Shumë prej vajzave largohen nga fshati kur arrijnë moshën madhore, ndërsa burrat që punojnë në qytetet përreth kthehen kryesisht gjatë fundjavave. Kjo situatë ka bërë që gratë e reja të kërkojnë që më shumë burra beqarë të shpërngulen në fshatin e tyre.
Fshati përmendet si shtëpia e rreth 600 grave, shumë prej të cilave janë të moshës 20 deri në 35 vjeç. Megjithatë, mundësitë për të krijuar lidhje romantike janë të kufizuara, pasi burrat që jetojnë aty janë kryesisht të martuar ose të afërm të tyre.
“Ne jemi të gjithë me të njëjtin gjak, prandaj nuk kam puthur një burrë për një kohë të gjatë”, është shprehur 23-vjeçarja Nina, sipas rrëfimit të publikuar.
Pikërisht për këtë arsye, vajzat kanë vendosur t’u bëjnë një ftesë beqarëve të interesuar, duke i inkurajuar të bëhen pjesë e komunitetit të tyre. Megjithatë, jo të gjithë burrat janë të gatshëm të shpërngulen në një vend ku gratë kanë një rol dominues në jetën e përditshme.
“Ne jetojmë në harmoni. Kur nuk ka burra, jemi shumë më të qeta, sepse përpiqemi t’i zgjidhim konfliktet përmes mirëkuptimit të ndërsjellë”, ka deklaruar 49-vjeçarja Rosana.
Por, pavarësisht jetës së qetë, dëshira për dashuri mbetet e fortë.
“Unë ëndërroj të bie në dashuri. Ne duam ta vazhdojmë jetën këtu, jo të largohemi nga fshati për të gjetur një burrë. Për këtë arsye, po kërkojmë burra që janë të gatshëm të lënë pas jetën e tyre dhe të bëhen pjesë e jona”, ka shtuar Nina.
Historia e këtij fshati ka tërhequr vëmendjen e publikut, duke nxitur diskutime mbi jetën në komunitete të veçanta dhe dëshirën e grave për të gjetur dashurinë pa u larguar nga vendi ku janë rritur.