Një operacion i zhvilluar këtë të diel ka çuar në zhvendosjen e 102 kontejnerëve me mbetje toksike të kompanisë Kurum International, të cilët më parë ndodheshin në Porto Romano.
Me urdhër të Prokurorisë, kontejnerët janë transferuar për lirimin e hapësirës dhe janë vendosur në një ambient privat në Spitallë, përballë zonës së re të banimit të ndërtuar për familjet e prekura nga tërmeti.
Agjencia e Administrimit të Pronave të Sekuestruara dhe Konfiskuara, e cila ka në administrim këto materiale, ka siguruar infrastrukturën për ruajtjen e tyre. Ndërkohë, Policia e Durrësit ka garantuar transportin dhe sigurinë e perimetrit ku janë vendosur kontejnerët.
Sipas analizave laboratorike të kryera në Itali, mbetjet industriale të rikthyera në Shqipëri rezultojnë toksike dhe përbëjnë rrezik serioz për shëndetin e njeriut dhe mjedisin.
Bëhet fjalë për rreth 2,800 ton mbetje të rrezikshme, të depozituara pranë zonave të banuara dhe jo larg një kampusi universitar. Këto mbetje, të eksportuara fillimisht nga Elbasan, u kthyen pasi u klasifikuan si të rrezikshme, duke nxitur një hetim të gjerë.
Prokuroria e Durrësit ka ngritur akuza ndaj drejtuesve të Kurum, si dhe ndaj kompanisë Sokolaj, e cila kishte realizuar eksportin e mbetjeve drejt Tajlandë.
Megjithatë, edhe në vendndodhjen e re, kontejnerët mbeten të ekspozuar ndaj kushteve atmosferike, duke rritur rrezikun e dëmtimit. Ende nuk ka një vendim përfundimtar mbi trajtimin apo asgjësimin e këtyre mbetjeve, ndërsa pritet përfundimi i procesit gjyqësor për të përcaktuar fatin e tyre.