Njoftohet me urgjencë se do të hapen dy destinacione të reja nga Rinasi që prekin çdo shqiptar
Tiranë, 2026 – Aeroporti Ndërkombëtar i Tiranës (TIA) ka bërë një njoftim të rëndësishëm që prek të gjithë shqiptarët, duke konfirmuar nisjen e dy linjave të reja ajrore nga kompania Ryanair.
Bëhet fjalë për destinacionet Liverpool dhe Dublin, të cilat do të lidhen drejtpërdrejt me Tiranën, duke zgjeruar ndjeshëm mundësitë e udhëtimit për qytetarët. Të dyja linjat do të operojnë dy herë në javë, duke ofruar më shumë fleksibilitet dhe çmime konkurruese.
Hapja e këtyre linjave është shoqëruar me një event të veçantë në aeroport, ku morën pjesë përfaqësues të TIA-s, të Ryanair dhe pasagjerë të shumtë, duke shënuar një tjetër hap të rëndësishëm në zgjerimin e rrjetit ajror të Shqipërisë.
Destinacioni i Dublinit shënon një moment historik, pasi është lidhja e parë direkte e Shqipërisë me Irlandën, duke hapur një treg krejtësisht të ri për udhëtime dhe bashkëpunim.
Ndërkohë, linja drejt Liverpool forcon edhe më shumë lidhjet me Mbretërinë e Bashkuar, një treg kyç për turizmin dhe diasporën shqiptare.
Sipas Aeroportit Ndërkombëtar të Tiranës, këto zhvillime pritet të rrisin ndjeshëm fluksin e udhëtarëve, të nxisin turizmin dhe të kontribuojnë në zhvillimin ekonomik të vendit.
Përfaqësuesja e aeroportit, Manjola Kaso, u shpreh se sezoni veror 2026 do të sjellë më shumë mundësi për udhëtarët dhe do të forcojë lidhjet ajrore të Shqipërisë me Evropën.