E FUNDIT: Donald Trump jep lajmin e madh për Ngushticën e Hormuzit!

Presidenti i Shteteve të Bashkuara të Amerikës, Donald Trump, ka deklaruar se Ngushtica e Hormuzit po rihapet dhe se anijet kanë nisur të rikthehen në qarkullim.

Në një intervistë për Fox Business, Trump nuk dha detaje të mëtejshme mbi zhvillimet në terren, duke lënë të paqartë situatën konkrete në rajon.

Deklarata e tij vjen në një moment tensionesh të larta, pasi Irani ka paralajmëruar sulme të mundshme ndaj transportit detar në Gjirin Persik, Detin e Kuq dhe Gjirin e Omanit. Këto kërcënime lidhen me bllokadën detare të vendosur nga Shtetet e Bashkuara të Amerikës ndaj porteve iraniane.

Sipas raportimeve ndërkombëtare, bllokada amerikane ka hyrë në fuqi të hënën, ndërsa ushtria amerikane ka bërë të ditur se gjatë 24 orëve të para nuk është regjistruar asnjë anije që ka kaluar në zonën e prekur.

Intervista e Trump është realizuar përpara deklaratave më të fundit kërcënuese nga Irani. Në të, ai theksoi se situata mbetet e paqartë, duke shtuar se “nuk kemi përfunduar ende”. Megjithatë, ai nuk përjashtoi mundësinë që konflikti të jetë pranë një zgjidhjeje, duke lënë të hapur edhe mundësinë e një marrëveshjeje të madhe mes palëve.

Zhvillimet e fundit kanë rritur ndjeshëm shqetësimet për sigurinë e transportit detar ndërkombëtar, pasi Ngushtica e Hormuzit konsiderohet një nga korridoret më të rëndësishme për furnizimin global me energji.