Presidenti i SHBA-së, Donald Trump, është shprehur i bindur se Irani do të rikthehet në tryezën e negociatave me Uashingtonin, duke paralajmëruar pasoja të rënda në rast të kundërt.
“Ata do të negociojnë. Nëse nuk e bëjnë, do të përballen me probleme që nuk i kanë parë kurrë më parë”, deklaroi ai gjatë një interviste.
Trump theksoi se qëllimi i SHBA-së është arritja e një marrëveshjeje të drejtë, duke shtuar se Irani nuk duhet të ketë armë bërthamore. “Shpresojmë që ata të arrijnë një marrëveshje dhe të rindërtojnë vendin e tyre, por pa armë bërthamore. Kjo nuk mund të lejohet”, u shpreh ai.
Nga ana tjetër, kryetari i Parlamentit iranian, Mohammad Bagher Ghalibaf, deklaroi më herët se Teherani nuk do të hyjë në negociata për aq kohë sa SHBA-ja vazhdon me kërcënime. Ai paralajmëroi se Irani është i gatshëm të tregojë një “ekuilibër të ri pushteti” në fushën e betejës, duke shtuar se përgatitjet janë në zhvillim prej javësh.
Tensionet mes palëve janë rritur ndjeshëm pas operacionit të gjerë ushtarak të nisur nga Shtetet e Bashkuara dhe Izraeli kundër Iranit më 28 shkurt. Më 7 prill u shpall një armëpushim dyjavor, ndërsa më 11 prill u zhvilluan bisedime në Islamabad, pa arritur një marrëveshje përfundimtare.
Megjithëse ende nuk ka konfirmim për një raund të ri negociatash, Uashingtoni ka sinjalizuar gatishmërinë për të vazhduar dialogun, ndërsa raportimet sugjerojnë se takime të tjera mund të zhvillohen së shpejti.