Një lajm i trishtë ka ardhur nga radhët e Partisë Demokratike. Deputeti demokrat Saimir Korreshi ka njoftuar përmes një postimi në rrjetin social Facebook ndarjen nga jeta të Profesor Piro Banos, ish-nënkryetar i Degës së PD në Lushnjë.
Në mesazhin e tij, Korreshi shpreh dhimbjen për humbjen, duke e kujtuar të ndjerin si një njeri me vlera të larta njerëzore dhe kontribute të çmuara në jetën politike lokale.
“Lamtumirë profesor Piro”, shkruan ai, duke shtuar se kanë ndarë së bashku momente të rëndësishme gjatë angazhimit në Partinë Demokratike. “Vizionar dhe njeri i sinqertë, një nga burrat e rrallë të qytetit”, thekson më tej deputeti.
Profesor Piro Bano do të përcillet për në banesën e fundit ditën e nesërme, më 6 prill, në orën 10:00.
Postimi i plotë i Korreshit:
“Lamtumirë Profesor Piro!
Qytetar fisnik dhe familjar model.
Me Profesorin kemi ndarë momente të bukura dhe të vështira në drejtimin e PD Lushnjë, ku ka shërbyer si nënkryetar i Degës së Partisë Demokratike.
Vizionar dhe njeri i sinqertë, një nga burrat e rrallë të qytetit.
Të qoftë dheu i lehtë, Profesor Piro!”