Një aksident tragjik ka ndodhur në Kroaci, ku një shofer kamioni nga Maqedonia e Veriut ka humbur jetën në autostradën Bregana – Zagreb.
Sipas informacioneve nga policia kroate, ngjarja ka ndodhur dje rreth orës 14:00 pranë zonës së Sredancit, në drejtim të Breganës. Kamioni që drejtohej nga viktima doli nga rruga dhe u përplas fuqishëm me barrierat mbrojtëse anësore të autostradës.
Pas përplasjes, automjeti goditi edhe një linjë elektrike dhe më pas u përfshi nga flakët. Autoritetet morën fillimisht njoftim për një kamion të përfshirë nga zjarri me një person brenda.
Sipas raportimeve jozyrtare, shoferi mbeti i bllokuar në kabinën e mjetit dhe nuk arriti të dilte në kohë, duke humbur jetën tragjikisht në vendngjarje.
Mediat kroate bëjnë me dije se viktima ishte shtetas i Maqedonisë së Veriut dhe punonte si shofer kamioni.
Në vendin e ngjarjes ndërhynë menjëherë policia, zjarrfikësit dhe ekipet emergjente, ndërsa hetimet po vazhdojnë për zbardhjen e plotë të shkaqeve të aksidentit.
Be First to Comment