Sali Berisha është rizgjedhur kryetar i Partisë Demokratike deri në vitin 2030, në një proces ku nuk pati kandidatë rivalë.
Në kushte normale, vëmendja do të ishte përqendruar tek reagimet dhe urimet nga aleatët ndërkombëtarë të PD-së, veçanërisht nga Partia Popullore Evropiane (EPP), ku ajo është anëtare prej vitesh.
Ndër figurat që pritet të përcjellin mesazhe urimi ose përshëndetje janë Manfred Weber, një nga figurat kryesore të qendrës së djathtë evropiane, Friedrich Merz nga Gjermania, Kyriakos Mitsotakis nga Greqia, Donald Tusk si dhe Antonio Tajani. Po ashtu përmendet edhe Dolors Montserrat, e cila ka udhëhequr delegacione të EPP-së në Shqipëri.
Megjithatë, për shkak të statusit “non grata” të Berishës nga SHBA dhe Britania e Madhe, si dhe polemikave që kanë shoqëruar lidershipin e tij vitet e fundit, pritet që reagimet të jenë të rezervuara. Edhe nga rajoni, përfshirë Lumir Abdixhikun e LDK-së, nuk pritet ndonjë urim publik.
Ndërkohë, Berisha e ka komentuar vetë procesin, duke deklaruar se mbështetja e marrë brenda partisë tregon forcimin e tij politik dhe konsolidimin e PD-së nën drejtimin e tij.