Hiqet teli me gjemba në Zvërnec, situata paraqitet e qetë
Është hequr teli me gjemba që ishte vendosur përgjatë rrethimit të kantierit të punimeve në zonën e Portonovës në Zvërnec. Teli ishte vendosur mbi tokë dhe përgjatë perimetrit të kantierit, ku prej kohësh po zhvillohen punime në kuadër të projektit turistik.
Sipas informacioneve nga terreni, largimi i telit me gjemba është kryer gjatë ditës së diel nga vetë investitorët e projektit. Vendosja e tij kishte ngjallur reagime të forta pas protestës së zhvilluar disa ditë më parë, gjatë së cilës pati përplasje mes protestuesve dhe punonjësve të sigurisë private. Si pasojë e incidentit, një prej protestuesve u shoqërua dhe më pas u arrestua nga policia.
Gjatë ditës së hënë, situata në zonë është paraqitur e qetë. Nuk janë vërejtur lëvizje të mjeteve të rënda apo zhvillim i punimeve brenda kantierit. Po ashtu, prania e punonjësve të sigurisë private ka qenë dukshëm më e ulët krahasuar me ditët e mëparshme.
Ndërkohë, kryeministri Edi Rama ka reaguar lidhur me projektin në Zvërnec, duke deklaruar se nuk po ndërtohet në lumin Vjosë dhe se kompania që vendosi gardhin me tela me gjemba do të përballet me një gjobë të konsiderueshme.
Banorët dhe vizitorët e zonës vijojnë të ndjekin me interes zhvillimet rreth projektit, ndërsa mbetet për t’u parë se si do të vijojë situata dhe nëse punimet do të rifillojnë në ditët në vazhdim.