Bordi ul sërish çmimet e karburanteve, nafta në 180 lekë dhe benzina në 168 lekë/litër
Bordi i Transparencës ka vendosur një tjetër ulje të çmimeve të karburanteve në vend. Sipas vendimit të marrë në mbledhjen e datës 16 qershor 2026, nafta do të tregtohet me çmim maksimal 180 lekë për litër, duke shënuar një ulje prej 3 lekësh krahasuar me çmimin e mëparshëm.
Edhe benzina ka pësuar ulje, duke zbritur në 168 lekë për litër, ose 2 lekë më pak se niveli i mëparshëm prej 170 lekësh për litër.
Vendimi hyn në fuqi sot në orën 14:00 dhe do të mbetet në fuqi deri në mbledhjen e ardhshme të Bordit, ku do të rishikohen sërish çmimet në bazë të zhvillimeve në tregjet ndërkombëtare.
Bordi ka paralajmëruar operatorët e tregut se zbatimi i çmimeve të përcaktuara është i detyrueshëm. Në rast të shkeljeve, autoritetet kanë njoftuar se do të merren masa administrative, deri në pezullimin e aktivitetit të subjekteve që nuk respektojnë vendimin.
Sipas tabelës së re, çmimi maksimal i shitjes me shumicë për gazoilin është 168 lekë për litër, ndërsa për benzinën 156 lekë për litër.
Institucionet përgjegjëse theksojnë se masat synojnë mbrojtjen e konsumatorëve dhe garantimin e konkurrencës së ndershme në tregun e karburanteve. Ndërkohë, bazuar në metodologjinë aktuale të llogaritjes, çmimet mbeten nën kufijtë e përcaktuar nga akti normativ për uljen e akcizës, çka do të thotë se akciza vazhdon të aplikohet në nivelin e plotë 100%.
Për sektorin e peshkimit, çmimi i gazoilit të përjashtuar nga disa taksa dhe detyrime fiskale është përcaktuar në 84 lekë për litër.
