Një aksident tragjik ka ndodhur në provincën Vorarlberg të Austrisë, ku një 41-vjeçar dhe vajza e tij 6-vjeçare humbën jetën pasi traktori me të cilin po udhëtonin doli nga rruga dhe u përmbys në një terren të pjerrët. Vajza tjetër e familjes, 4 vjeçe, arriti t’i mbijetojë aksidentit.
Sipas të dhënave paraprake, babai po drejtonte traktorin me një rimorkio, ku ndodheshin edhe dy vajzat e tij. Dyshohet se mjeti humbi kontrollin, rrëshqiti në një shpat me bar dhe u përmbys në një zonë të vështirë për t’u arritur.
Për shkak se aksidenti ndodhi në një vend të izoluar, familjarët nuk e kuptuan menjëherë çfarë kishte ndodhur. E shqetësuar nga mungesa e tyre, nëna doli për t’i kërkuar dhe ishte ajo që zbuloi vendin e aksidentit. Menjëherë pas kësaj, ajo njoftoi shërbimet e emergjencës.
Pavarësisht ndërhyrjes së shpejtë të ekipeve mjekësore, 41-vjeçari dhe vajza 6-vjeçare kishin ndërruar jetë në vendngjarje. Ndërkohë, vajza 4-vjeçare u gjet e plagosur, mori ndihmën e parë dhe më pas u transportua me helikopter drejt spitalit rajonal në Feldkirch për trajtim të specializuar.
Tragjedia ka prekur thellë edhe ekipet e shpëtimit. Zjarrfikësit vullnetarë të zonës njihnin familjen e viktimave, ndaj, për shkak të ngarkesës së madhe emocionale, nxjerrja e trupave u krye nga një njësi zjarrfikëse e një komune fqinje.
“Ka ndërhyrje që të lënë pa fjalë”, shkruan zjarrfikësit në mesazhin e tyre të publikuar në rrjetet sociale, duke shprehur dhimbjen për humbjen e rëndë.
Be First to Comment