Tragjedi në det në Indonezi
Një tragjedi e rëndë është regjistruar në Indonezi, ku një traget me qindra persona në bord është përfshirë nga një zjarr i fuqishëm gjatë lundrimit.
Sipas autoriteteve indoneziane, të paktën 5 persona kanë humbur jetën, ndërsa 41 të tjerë rezultojnë ende të zhdukur. Deri tani, 225 persona janë shpëtuar.
Zjarri është përhapur me shpejtësi në traget, duke shkaktuar panik te pasagjerët dhe ekuipazhi. Disa prej tyre, në përpjekje për t’i shpëtuar flakëve, janë detyruar të hidhen në det.
Menjëherë pas alarmit, ekipet e kërkim-shpëtimit janë vënë në lëvizje. Në operacion janë përfshirë edhe disa mjete lundruese që ndodheshin pranë vendit të ngjarjes.
Megjithatë, ndërhyrja është vështirësuar për shkak të intensitetit të flakëve dhe rrezikut që paraqiste trageti. Katër anije nuk kanë mundur t’i afrohen menjëherë për shkak të kushteve të rrezikshme.
Trageti ishte nisur nga Surabaya, në provincën Java Lindore, me destinacion Makassar, në Sulawesin Jugor.
Kapiteni kishte arritur të njoftonte kompaninë për zjarrin, por pak minuta më vonë komunikimi me të është ndërprerë.
Autoritetet kanë aktivizuar një operacion të gjerë emergjent për gjetjen e personave që rezultojnë të zhdukur. Ekipet po kontrollojnë zonën detare dhe po verifikojnë informacionet për personat e shpëtuar.
Deri tani, bilanci zyrtar është 5 viktima, 225 persona të shpëtuar dhe 41 të zhdukur.
Shkaku i zjarrit ende nuk është përcaktuar. Autoritetet pritet të zhvillojnë një hetim për të zbardhur rrethanat e incidentit dhe për të përcaktuar se si nisi dhe u përhap zjarri.
Ndërkohë, operacioni i kërkim-shpëtimit vijon pa ndërprerje, ndërsa autoritetet shpresojnë që personat e zhdukur të lokalizohen sa më shpejt.