Me nisjen e sezonit të ngarkuar veror dhe shtimin e ndjeshëm të numrit të pasagjerëve, Aeroporti Ndërkombëtar i Tiranës ka publikuar një apel të rëndësishëm për të gjithë udhëtarët.
Përmes një njoftimi zyrtar, aeroporti rekomandon që pasagjerët të mbërrijnë në terminal të paktën tre orë para nisjes së fluturimit, për të shmangur vonesat dhe vështirësitë gjatë procedurave të udhëtimit.
Sipas autoriteteve aeroportuale, paraqitja në kohë mundëson kryerjen pa probleme të procesit të check-in-it, kontrolleve të sigurisë dhe formaliteteve të tjera të nevojshme para fluturimit.
“Për shkak të rritjes së fluksit të udhëtarëve gjatë muajve të verës, u bëjmë thirrje të gjithë pasagjerëve të paraqiten në terminal të paktën 3 orë përpara nisjes së fluturimit. Kjo ndihmon në përfundimin e procedurave pa vonesa dhe garanton një eksperiencë sa më komode për të gjithë udhëtarët”, thuhet në njoftimin e Aeroportit Ndërkombëtar të Tiranës.