Kanë nisur zyrtarisht punimet për ndërtimin e aksit të ri rrugor Janinë–Kakavijë, një projekt strategjik që pritet të përmirësojë ndjeshëm lidhjen mes Greqisë dhe Shqipërisë, duke lehtësuar qarkullimin e njerëzve dhe mallrave.
Në fazën e parë kanë filluar punimet përgatitore në terren, ku përfshihen pastrimi i zonës, punimet tokësore dhe sistemimi i traseve me mjete të rënda. Këto ndërhyrje shënojnë fillimin e zbatimit të projektit.
Kontrata për ndërtimin e rrugës, me një vlerë prej 310 milionë eurosh (me TVSH), u nënshkrua në fund të vitit 2024. Sipas autoriteteve greke, projekti parashikohet të përfundojë brenda katër viteve.
Si do të jetë rruga e re?
Aksi Janinë–Kakavijë do të ketë një gjatësi prej rreth 70 kilometrash dhe do të jetë vazhdim i Autostradës Joniane, duke e lidhur Janinën me pikën kufitare të Kakavijës. Rruga është pjesë e rrjetit evropian të transportit (TEN-T) dhe konsiderohet një nga korridoret më të rëndësishme në rajon.
Projekti është ndarë në dy segmente:
- Janinë – Kalpak: rreth 46.4 kilometra me trase të re dhe gjashtë nyje moderne pa kryqëzime në nivel.
- Kalpak – Kakavijë: rreth 23.1 kilometra, ku do të modernizohet rruga ekzistuese deri në kufi.
Autostrada do të ndërtohet me dy korsi për secilin drejtim, korsi emergjence, ndarje qendrore dhe barriera sigurie, ndërsa shpejtësia e projektuar do të jetë 100 km/orë.
Çfarë përfitimesh priten?
Me përfundimin e këtij investimi, koha e udhëtimit nga Athina deri në Kakavijë pritet të ulet në rreth 4 orë e 30 minuta, duke sjellë kursim të konsiderueshëm kohe dhe rritje të sigurisë rrugore.
Projekti do të përmirësojë gjithashtu lidhjen me Autostradën Egnatia, aeroportin dhe zonën industriale të Janinës, si edhe do të lehtësojë aksesin drejt porteve të Igumenicës dhe Patrës.
Përveç ndikimit në infrastrukturë, aksi i ri pritet të forcojë bashkëpunimin ekonomik dhe lëvizjen ndërkufitare mes Shqipërisë dhe Greqisë, duke krijuar kushte më të mira për udhëtarët, bizneset dhe transportin në të gjithë rajonin.
Be First to Comment