NAFTA NË SHQIPËRI NDËR MË TË SHTRENJTAT NË BOTË! ÇMIMET GODASIN XHEPAT E QYTETARËVE
Çmimi i naftës në Shqipëri vijon të jetë ndër më të lartët, jo vetëm në Europë, por edhe në rang botëror. Sipas të dhënave të platformës Global Petrol Prices, gjatë muajit gusht një litër naftë në Shqipëri kushton rreth 2.5 dollarë, duke e renditur vendin në vendin e 13-të në botë për çmimin e karburantit.
Me këtë nivel çmimi, Shqipëria krahasohet me vende si Monako, Zvicra, Finlanda dhe Singapori, ndërsa mesatarja europiane është rreth 2.2 dollarë për litër.
Diferenca bëhet edhe më e dukshme nëse krahasimi bëhet me vendet e rajonit. Në Maqedoninë e Veriut, për shembull, çmimi i naftës raportohet rreth 1.49 euro për litër, duke e bërë karburantin ndjeshëm më të lirë se në Shqipëri.
Por problemi nuk është vetëm çmimi që qytetarët paguajnë në pompë. Një tjetër renditje, e publikuar nga platforma FuelWide, e vendos Shqipërinë në vendin e dytë në Europë, pas Ukrainës, sa i përket kostos së naftës në raport me pagat mesatare.
Sipas të dhënave të cituara nga Balkan View, me një pagë mesatare prej rreth 740 eurosh, një shqiptar mund të blejë afërsisht 363 litra naftë. Në Kosovë, pavarësisht nivelit më të ulët të pagave, një pagë mesatare mund të blejë rreth 103 litra më shumë.
Kjo situatë e kthen karburantin në një barrë të rëndë për buxhetet familjare, por edhe për bizneset dhe sektorin e transportit. Çdo rritje e çmimit të naftës mund të ndikojë më tej në kostot e transportit dhe, për rrjedhojë, në çmimet e mallrave dhe shërbimeve.
Në krye të renditjes botërore për çmimin më të lartë të karburantit qëndron Hong Kongu, me rreth 4.6 dollarë për litër.
Shqipëria përballet kështu me një kombinim të vështirë: çmime të larta të naftës, paga më të ulëta dhe fuqi blerëse të kufizuar, duke e bërë koston e karburantit një prej barrëve më të ndjeshme për qytetarët.