Rama nga Fieri: Deri më 12 qershor të mbyllet debati për Zvërnecin
Në kuadër të turit të takimeve për 35-vjetorin e themelimit të Partisë Socialiste, kryeministri Edi Rama u ndal në Fier, qytet që ai e cilësoi si “kryeqytetin e socialistëve”.
Gjatë fjalës së tij, Rama u ndal gjerësisht te protestat që po zhvillohen para Kryeministrisë kundër projektit të investimit në Zvërnec. Ai tha se një pjesë e protestuesve po ndikohen nga narrativa të pavërteta dhe nga forca të reja politike, të cilat sipas tij po përpiqen të manipulojnë opinionin publik.
Kryeministri theksoi se protestat për çështje mjedisore nuk mund të përdoren si argument për të kërkuar largimin e qeverisë, duke nënvizuar se Shqipëria ka ndërmarrë hapa të rëndësishëm në mbrojtjen e natyrës, mes tyre edhe shpalljen e lumit Vjosa dhe deltës së tij si Park Kombëtar.
Rama bëri thirrje që deri më 12 qershor të përfundojë debati publik mbi projektin në Zvërnec, duke kërkuar ndarjen e ambientalizmit të vërtetë nga, siç u shpreh ai, “informacionet e rreme, llapaqorrizmi dhe qorrollapizmi”.
Ai kujtoi gjithashtu se më 12 qershor në Tiranë do të organizohet festa për 35-vjetorin e Partisë Socialiste, ku pritet pjesëmarrja e mijëra mbështetësve.
Megjithatë, Rama nuk sqaroi konkretisht se çfarë pritet të ndodhë pas kësaj date dhe pse e konsideron 12 qershorin si një moment kyç për mbylljen e diskutimeve mbi projektin e Zvërnecit.