Rama u përgjigjet kritikave të protestuesve nga Shkodra
Kryeministri Edi Rama reagoi nga Shkodra ndaj kritikave dhe akuzave të ngritura nga protestuesit kundër qeverisë.
Gjatë fjalës së tij, kreu i qeverisë mbrojti bilancin e qeverisjes, duke theksuar se Shqipëria ka pësuar ndryshime të mëdha krahasuar me vitet e mëparshme. Ai pranoi se jo çdo gjë është bërë në mënyrë perfekte, por hodhi poshtë akuzat që e cilësojnë qeverinë si tradhtare apo shkatërrimtare.
“Ne nuk pretendojmë se kemi bërë gjithçka mirë, por askush nuk mund të thotë se jemi tradhtarë apo shkatërrimtarë. Ne jemi patriotë dhe kemi punuar për të ndihmuar qytetarët në momentet më të vështira”, deklaroi Rama, duke përmendur rindërtimin pas tërmetit si një nga arritjet kryesore të qeverisë.
Kryeministri u ndal gjithashtu te debatet mbi zhvillimin dhe investimet në vend, duke kritikuar disa figura publike dhe influencues që, sipas tij, mbajnë qëndrime kontradiktore.
Ai tha se nuk është e drejtë që personat që udhëtojnë shpesh në destinacione të zhvilluara turistike jashtë vendit të kundërshtojnë projektet e zhvillimit në Shqipëri, ndërsa kërkojnë ruajtjen e plotë të zonave bregdetare pa ndërtime apo investime.