Tre persona humbën jetën dhe tre të tjerë mbetën të plagosur pas një sulmi me armë zjarri që ndodhi në qytetin e Gradaçacit, pranë kantonit të Tuzlës në Bosnjë dhe Hercegovinë.
Sipas autoriteteve, i dyshuari Nermin Sulejmanoviq, 35 vjeç, vrau ish-bashkëshorten e tij si dhe dy persona të tjerë, babë e bir, ndërsa plagosi një polic dhe dy civilë në lokacione të ndryshme të qytetit.
Pas disa orësh kërkime intensive, policia e gjeti Sulejmanoviqin të vdekur në automjetin e tij. Sipas autoriteteve, ai kreu vetëvrasje.
Zyra e Prokurorit në Tuzla bëri të ditur se hetimet po vazhdojnë në bashkëpunim me Ministrinë e Punëve të Brendshme për të zbardhur të gjitha rrethanat e ngjarjes.
Gjatë arratisjes, i dyshuari publikoi në rrjetet sociale pamje dhe detaje nga krimet që kishte kryer. Ministria e Brendshme konfirmoi se videot e shpërndara në internet janë fshirë më vonë nga platformat sociale.
Be First to Comment