“Dimër” në mes të verës? Goditja polare drejt nesh, reshje dhe ulje drastike e temperaturave, deri në 16°C

Ftohje e pazakontë në kulmin e verës, reshje dhe rënie e ndjeshme e temperaturave

Pas stuhive të fuqishme që përfshinë vendin gjatë ditëve të hëna dhe të martë, atmosfera do të stabilizohet përkohësisht. Megjithatë, temperaturat do të mbeten më të ulëta për shkak të masave të ftohta ajrore që po depërtojnë nga veriperëndimi i Evropës.

Të premten pritet ardhja e një vale tjetër të ftohtë me origjinë polare, e shoqëruar me lagështi atmosferike, e cila do të sjellë reshje shiu në të gjithë territorin. Në disa zona reshjet mund të jenë në formë rrebesheve të shkurtra, të shoqëruara lokalisht me vetëtima dhe bubullima. Gjatë ditës do të ketë edhe periudha me diell.

Era do të fryjë nga drejtimi i veriut, me intensitet herë pas here të lartë, me shpejtësi nga 15 deri në 45 km/h.

Temperaturat minimale do të zbresin nga 11 deri në 14°C, ndërsa maksimalet do të variojnë nga 16 deri në 19°C. Këto vlera të pazakonta për këtë periudhë do ta bëjnë motin të ngjajë më shumë me ditët e vjeshtës sesa me mesin e verës.

Nga e shtuna pritet përmirësim gradual i motit, me më shumë intervale me diell dhe rritje të lehtë të temperaturave, të cilat do të arrijnë deri në 21–25°C.

E diela do të sjellë mot kryesisht me diell dhe më të ngrohtë, me temperatura që pritet të afrohen deri në 30°C. Megjithatë, gjatë mbrëmjes ose natës mund të ketë sërish zhvillime të paqëndrueshme atmosferike.