Kryeministri Edi Rama ka deklaruar se nuk ka ndërmend të japë dorëheqjen, pavarësisht protestës që po zhvillohet prej javësh pranë zyrës së tij. Gjatë një mbledhjeje me grupin parlamentar socialist dhe kabinetin qeveritar, ai theksoi se mandatin e ka marrë nga qytetarët dhe se do ta çojë deri në fund.
Rama u shpreh se qeveria ka përgjegjësi të përmbushë programin për të cilin është votuar, duke theksuar se objektivi kryesor mbetet anëtarësimi i Shqipërisë në Bashkimin Evropian.
Sipas tij, protestat dhe debatet publike nuk do të ndryshojnë drejtimin e qeverisë, ndërsa shtoi se një pjesë e reagimeve në rrjetet sociale dhe në media ndikohen nga interesi për të tërhequr sa më shumë vëmendje dhe klikime.
“Kam marrë shumë mesazhe që më pyesin nëse kam menduar të jap dorëheqjen. Përgjigjja ime është e qartë: nuk kam ndërmend ta bëj një gjë të tillë”, u shpreh Rama.
Ai theksoi se një qeveri nuk duhet të marrë vendime nën presionin e protestave apo zhurmës politike, por të vazhdojë punën sipas mandatit që ka marrë nga qytetarët.
Në përfundim të fjalës së tij, Rama ritheksoi se fokusi i qeverisë mbetet procesi i integrimit evropian dhe zbatimi i reformave, duke nënvizuar se ky është angazhimi që ka marrë përballë qytetarëve.
Be First to Comment