Protesta e kësaj të enjteje para Kuvendit të Shqipërisë u zhvillua ndryshe nga ditët e mëparshme, pasi demonstruesit u grumbulluan pranë godinës së Parlamentit në kohën kur po mbahej seanca plenare.
Pas përfundimit të seancës, deputetët u detyruan të largoheshin përmes hyrjeve alternative, pasi hyrja kryesore ishte bllokuar nga protestuesit. Mes tyre ishte edhe deputetja socialiste Elisa Spiropali, e cila, ndonëse zgjodhi një dalje tjetër, nuk i shmangu komentet dhe thirrjet e turmës.
Protestuesit i drejtuan një ftesë publike për t’iu bashkuar protestës, e cila kishte hyrë në ditën e 19-të. Në përgjigje, Spiropali deklaroi shkurt: “Të gjithë kanë të drejtë të protestojnë”.
Ndërkohë, situata u tensionua për disa minuta, pasi protestuesit u zhvendosën me shpejtësi nga bulevardi “Dëshmorët e Kombit” drejt rrugës “Xhorxh Bush”, duke iu afruar hyrjeve të Kuvendit. Për shkak të zhvillimeve, kryetari i grupit parlamentar socialist, Niko Peleshi, mbylli me urgjencë seancën plenare.
Menjëherë pas kësaj, Garda e Republikës dhe Policia e Shtetit shtuan masat e sigurisë për të shmangur çdo incident të mundshëm. Gjatë gjithë kohës, protestuesit dëgjoheshin duke brohoritur slogane si “Ju erdhi fundi” dhe “Jepni dorëheqjen”.