Arrestimi i “Visit të Garave” në Palasë, detaje nga konflikti në vilë
Detaje të reja janë bërë publike lidhur me arrestimin e Elvis Kosovës, i njohur si “Visi i Garave”, në zonën e Palasës.
Sipas informacioneve të raportuara, ngjarja ka ndodhur në vilën ku qëndronte 40-vjeçari. Konflikti dyshohet se nisi pasi bashkëshortja e tij e gjeti në banesë me një tjetër grua. Situata më pas ka përshkallëzuar, ku Kosova dyshohet se ka ushtruar dhunë ndaj bashkëshortes dhe një punonjësi të sigurisë.
Gjatë përplasjes, 40-vjeçari dyshohet se ka kërcënuar bashkëshorten me një armë zjarri, e cila sipas policisë rezultonte të mbahej pa leje.
Në vilë kanë mbërritur edhe efektivët e Policisë, ndaj të cilëve i dyshuari dyshohet se ka bërë rezistencë fizike. Pas ndërhyrjes, policia ka arritur ta neutralizojë dhe ka sekuestruar armën e zjarrit.
Elvis Kosova është një emër i njohur për autoritetet. Në gusht 2024, ai u arrestua së bashku me një shtetas turk, nën dyshimet se ishin përfshirë në një skemë mashtrimi për përvetësimin e një automjeti luksoz “Audi”, me vlerë rreth 200 mijë euro, i marrë me qira në Gjermani.
Në korrik 2025, në garazhin e tij në zonën e “Liqenit të Thatë” u vendos tritol. Emri i Kosovës është përmendur gjithashtu në lidhje me atentatin e Rinasit, ku u vranë Gilmando Dani dhe Muçi Shaljani.
Automjeti tip “Mercedes-Benz”, me të cilin udhëtonin Dani dhe Shaljani dhe që u qëllua me breshëri plumbash, është raportuar se i përkiste Kosovës.
Vetë ai ka mohuar çdo lidhje me ngjarjen, duke deklaruar se nuk kujtonte të kishte pasur ndonjëherë në pronësi apo përdorim atë automjet dhe se nuk mund të dinte për lëvizjet e mjeteve të kompanisë së tij.
Hetimet për ngjarjen e fundit në Palasë vijojnë për të zbardhur të gjitha rrethanat dhe përgjegjësitë e mundshme.