Një tjetër segment i rëndësishëm rrugor është hapur për qarkullim, duke sjellë lehtësim për drejtuesit e mjeteve që udhëtojnë nga Tirana drejt juglindjes së vendit dhe Korçës.
Lajmi është bërë i ditur nga ministri i Infrastrukturës dhe Energjisë, Enea Karakaçi, i cili njoftoi se segmenti i ri tashmë është i aksesueshëm për qarkullim.
Bëhet fjalë për një pjesë rruge prej rreth 7.5 kilometrash, nga dalja e fshatit Labinot-Fushë deri rreth 500 metra pas fshatit Mirakë. Segmenti ka dy korsi për qarkullim dhe është pjesë e projektit për zgjerimin e aksit Elbasan–Qafë Thanë, në kuadër të Korridorit VIII.
Sipas ministrit Karakaçi, hapja e këtij segmenti pritet të ndikojë në përmirësimin e qarkullimit dhe rritjen e sigurisë në rrugë, ndërsa njëkohësisht do të shkurtojë kohën e udhëtimit dhe do të lehtësojë lëvizjen e qytetarëve dhe transportin e mallrave.
“Një tjetër segment i rëndësishëm i Korridorit VIII hapet për qarkullim. Segmenti prej 7.5 kilometrash tashmë është i aksesueshëm, duke përmirësuar ndjeshëm kushtet e lëvizjes dhe duke i dhënë një tjetër ritëm modernizimit të aksit Elbasan–Qafë Thanë”, bëri të ditur ministri përmes një postimi në rrjetet sociale.
Hapja e këtij segmenti përbën një tjetër etapë në punimet për modernizimin e infrastrukturës rrugore dhe përmirësimin e lidhjeve të transportit në juglindje të Shqipërisë.
Be First to Comment