Futbolli shqiptar dhe ai kosovar janë zgjuar këtë mëngjes me një lajm tragjik. Futbollisti i Elbasanit, Fatjon Bunjaku, ka humbur jetën në një aksident automobilistik që ndodhi pas mesnate në aksin Prishtinë–Mitrovicë.
Vetëm pak ditë para ngjarjes së rëndë, 22-vjeçari kishte ndarë me ndjekësit e tij një mesazh plot optimizëm dhe krenari pas përfundimit të sezonit me fanellën verdheblu. Në postimin e tij të fundit në rrjetet sociale, Bunjaku falënderonte tifozët për mbështetjen e vazhdueshme dhe shprehte entuziazmin për sfidat që e prisnin në arenën europiane.
“Faleminderit për këtë super mbështetje, tifozë verdheblu. Do të takohemi së shpejti edhe në arenën europiane”, shkruante ai, në një mesazh që sot merr një domethënie shumë më të dhimbshme për familjen, miqtë, bashkëlojtarët dhe tifozët e tij.
Sulmuesi iu bashkua Elbasanit verën e kaluar dhe u bë pjesë e një sezoni të suksesshëm, ku skuadra siguroi pjesëmarrjen në kompeticionet europiane. Paralelisht, ai ishte pjesë edhe e përfaqësueses së Kosovës U-21, duke u konsideruar si një nga futbollistët më premtues të brezit të tij.
Gjatë karrierës, Bunjaku kishte veshur fanellat e disa klubeve në Kosovë, mes tyre Malisheva, Gjilani, Liria dhe Trepça, duke ndërtuar gradualisht rrugën e tij drejt afirmimit në futbollin profesionist.
Ndarja e parakohshme nga jeta e Fatjon Bunjakut ka shkaktuar pikëllim të madh dhe reagime të shumta në komunitetin sportiv. Postimi i tij i fundit, ku fliste për rikthimin në fushë dhe emocionet e garave europiane, mbetet tashmë një kujtim prekës i një ëndrre që u ndërpre tragjikisht.
Kjo është një humbje e madhe për futbollin shqiptar dhe kosovar.