Një kamionist shqiptar ka ndërruar jetë në Itali, pasi u gjet pa ndjenja brenda automjetit që drejtonte. Rrethanat e ngjarjes mbeten ende të paqarta, ndërsa dyshimet e para flasin për një problem të papritur kardiak.
Ngjarja është regjistruar tre ditë më parë në portin e Ankonës, pranë hyrjes së zonës së përpunimit. Menjëherë pas alarmit, në vendngjarje mbërritën ekipet e Kryqit të Kuq, të cilat tentuan ta reanimonin shoferin.
68-vjeçari u transportua me urgjencë drejt spitalit rajonal të Torrette, ku mjekët vijuan përpjekjet për t’i shpëtuar jetën, duke përdorur edhe defibrilatorin dhe trajtimet e nevojshme të ndihmës së parë. Megjithatë, ai nuk arriti të mbijetojë.
Sipas mediave italiane, mjekët dyshojnë se shkaku i vdekjes mund të ketë qenë një arrest kardiak. Ndërkohë, autoritetet kanë nisur hetimet për të sqaruar plotësisht ngjarjen dhe pritet edhe rezultati i autopsisë. Identiteti i viktimës nuk është bërë ende publik.