Zbulim i rrallë në Kinë: Dinozauri me pupla që dukej sikur kishte katër krahë
Një specie e re dinosauri është zbuluar në Kinë dhe po tërheq vëmendjen e studiuesve për pamjen e saj të pazakontë. Fosili i përket një dinosauri të vogël me pupla, i cili kishte struktura të gjata në gjymtyrët e përparme dhe të pasme, duke krijuar përshtypjen e një kafshe me “katër krahë”.
Specia e re është emërtuar Norellraptor barsboldi dhe është zbuluar në formacionin fosil Jiufotang, në provincën Liaoning. Sipas vlerësimeve shkencore, ajo ka jetuar rreth 120–125 milionë vjet më parë, gjatë Kretakut të Hershëm.
Fosili është ruajtur në gjendje të jashtëzakonshme dhe i ka lejuar studiuesit të analizojnë me detaje skeletin dhe gjurmët e puplave. Ekzemplari ishte rreth 57 centimetra i gjatë, ndërsa pupla janë identifikuar në gjymtyrët e përparme, këmbët e pasme dhe në bisht.
Struktura që krijonte pamjen e “katër krahëve”
Norellraptor barsboldi bënte pjesë në grupin e microraptorinëve, dinosaurë të vegjël me pupla që lidhen në mënyrë evolucionare me linjën që çoi te zogjtë.
Një nga veçoritë më interesante të këtij ekzemplari janë puplat e gjata në këmbët e pasme dhe në gjymtyrët e përparme. Kjo strukturë i jepte një pamje të pazakontë dhe mund të ketë luajtur rol në mënyrën se si kafsha lëvizte në ajër.
Studiuesit theksojnë se prania e këtyre strukturave nuk dëshmon domosdoshmërisht se dinozauri fluturonte si zogjtë e sotëm. Megjithatë, zbulimi mund të ndihmojë në studimin e mënyrës se si aftësia për të fluturuar ose për të rrëshqitur në ajër u zhvillua gjatë evolucionit.
Një tjetër dëshmi për evolucionin e fluturimit
Sipas autorëve të studimit, fosili i ri mund të ofrojë të dhëna të rëndësishme mbi evolucionin e dinosaurëve me pupla dhe lidhjen e tyre me zogjtë e hershëm.
Emri Norellraptor barsboldi është vendosur në nder të paleontologëve Mark Norell dhe Rinchen Barsbold, të njohur për kontributet e tyre në studimin e dinosaurëve dhe evolucionit të zogjve.
Zbulimi i këtij ekzemplari shton një tjetër pjesë në mozaikun shkencor të evolucionit, duke treguar se mënyrat se si dinosaurët me pupla përshtateshin për lëvizjen në ajër mund të kenë qenë shumë më të ndryshme nga sa mendohej më parë.