Zjarri në Sferkë, një i helmuar dërgohet në spital, të tjerët marrin ndihmë në vendngjarje

Disa persona helmohen nga tymi gjatë protestës në Sferkë, njëri dërgohet në spital

Disa persona kanë pësuar helmim nga tymi mbrëmjen e së martës në fshatin Sferkë, ku po zhvillohej një protestë lidhur me situatën e krijuar në zonë. Për ngjarjen ka reaguar Prokuroria Themelore në Pejë, e cila ka konfirmuar se në vendngjarje kanë intervenuar menjëherë Policia e Kosovës, ekipet emergjente dhe zjarrfikësit.

Zëdhënësi i Prokurorisë Themelore në Pejë, Shkodran Nikçi, bëri të ditur se një person është transportuar në Spitalin Rajonal të Pejës për trajtim mjekësor, ndërsa disa persona të tjerë kanë marrë ndihmën e parë në vendngjarje.

“Si pasojë e situatës së krijuar në vendin e ngjarjes janë Policia e Kosovës, ekipet emergjente dhe zjarrfikësit. Një person është dërguar për trajtim mjekësor në Spitalin Rajonal të Pejës, ndërsa personat e tjerë janë trajtuar në vendngjarje”, deklaroi Nikçi.

Prokuroria njoftoi gjithashtu se është kërkuar angazhimi i ekipeve shtesë të zjarrfikësve për lokalizimin e zjarrit në zonë.

Lidhur me zjarrin që përfshiu një deponi mbeturinash javën e kaluar, autoritetet kanë autorizuar ekspertë të zjarreve për të përcaktuar shkaqet e tij. Nëse hetimet vërtetojnë se zjarri është shkaktuar nga veprimi i njeriut, do të ndërmerren masa ligjore ndaj personave përgjegjës.

Hetimet për rastin janë ende në zhvillim, ndërsa institucionet kompetente vijojnë të monitorojnë situatën në terren.