Një aksident i rëndë rrugor ka tronditur Turqinë perëndimore, ku një autobus pasagjerësh doli nga rruga, u përplas me barrierat mbrojtëse dhe më pas u përfshi nga flakët, duke shkaktuar tetë viktima dhe dhjetëra të plagosur.
Ngjarja ndodhi në orët e para të mëngjesit të së dielës, rreth orës 01:40, në autostradën Denizli–Aydın, pranë zonës së Sarayköy në provincën e Denizlit. Sipas mediave turke, autobusi i kompanisë së transportit “Pamukkale Tourism”, që po kryente linjën Izmir–Antalia, humbi kontrollin pranë lagjes Tırkaz dhe u përplas me barrierat anësore të rrugës.
Pas përplasjes, mjeti u përfshi nga një zjarr i fuqishëm që u përhap me shpejtësi. Në autobus udhëtonin 38 pasagjerë dhe tre anëtarë të ekuipazhit.
Mes viktimave raportohet se janë shoferi 50-vjeçar Mustafa Fevzi Mertun, një shtetas i huaj, një foshnjë 9-muajshe dhe babai i saj. Sipas autoriteteve, disa prej pasagjerëve humbën jetën pasi mbetën të bllokuar pranë daljeve të autobusit gjatë panikut të shkaktuar nga flakët.
Pas njoftimeve të para nga drejtuesit e mjeteve që kalonin në zonë, në vendngjarje mbërritën forca të shumta emergjence, përfshirë zjarrfikësit, policinë, ekipet mjekësore dhe xhandarmërinë. Pasagjerët që arritën të largoheshin nga autobusi morën ndihmën e parë në vend, ndërsa 33 të plagosurit u transportuan drejt spitaleve të Denizlit dhe Sarayköy për trajtim mjekësor.
Pas neutralizimit të flakëve, ekipet mjeko-ligjore kryen ekspertizat në vendngjarje dhe nxorën trupat e viktimave nga mbetjet e autobusit, i cili u shkatërrua pothuajse plotësisht nga zjarri. Trupat u dërguan në Institutin e Mjekësisë Ligjore në Denizli për procedurat përkatëse.
Aksidenti ndodhi në fund të festës së Kurban Bajramit, periudhë gjatë së cilës trafiku në rrugët e Turqisë rritet ndjeshëm për shkak të udhëtimeve familjare dhe pushimeve.
Autoritetet turke kanë nisur një hetim të plotë për të përcaktuar shkaqet e aksidentit, ndërsa ekipet e sigurisë vijojnë kontrollet në zonë për të përjashtuar çdo pasojë tjetër të mundshme nga ngjarja.