SPAK nis hetimet për çështjen e Zvërnecit, sekuestrohen dokumente të rëndësishme
Prokuroria e Posaçme Kundër Korrupsionit dhe Krimit të Organizuar (SPAK) ka hapur një hetim lidhur me situatën në Zvërnec, duke vënë në fokus procedurat e ndjekura për ndryshimin e statusit të zonës dhe administrimin e truallit ku planifikohet të zhvillohet një projekt investues.
Në kuadër të këtij hetimi, janë kryer kontrolle dhe janë sekuestruar dokumente që lidhen me procedurat administrative dhe vendimet e marra nga institucionet përkatëse.
Pas interesimit të mediave për këtë çështje, SPAK konfirmoi se hetimet janë në proces, por nuk dha detaje të mëtejshme mbi veprimet e ndërmarra apo personat që mund të jenë nën verifikim.
“Në përgjigje të pyetjes suaj, çështja është në hetim dhe nuk kemi komente”, thuhet në reagimin zyrtar të zyrës së shtypit pranë SPAK.
Burime pranë hetimit bëjnë me dije se vëmendja do të përqendrohet te ligjshmëria e procedurave që lidhen me ndryshimin e statusit të zonës dhe mënyrën e administrimit të truallit në Zvërnec, një çështje që ka ngjallur interes të madh publik.