Pedagogia dhe deputetja e Partisë Socialiste, Iris Luarasi, ka komentuar protestat e fundit në Tiranë kundër ndërtimit të një resorti në Zvërnec, duke thënë se ndonëse qytetarët kanë arsye për të protestuar në shumë raste, sipas saj kjo nuk është protesta e duhur në këtë situatë.
“Në mendimin tim, ka arsye për protesta për shumë çështje, por kjo nuk më duket si protesta e duhur. Të jesh 13 vite në pushtet ka kosto dhe ka njerëz që kanë arsye të protestojnë,” deklaroi Luarasi në emisionin “Trialog” në RTSH.
Ajo theksoi se ekziston një keqkuptim rreth çështjes së Zvërnecit, të cilën e cilësoi si një problem me karakter privat dhe jo të zgjidhshëm nga qeveria.
“Në Zvërnec banorët kanë të drejtë të kenë pretendime, por nëse bëhet fjalë për toka të marra me mashtrime, këtë nuk e zgjidh qeveria, por drejtësia,” u shpreh ajo.
Duke komentuar pamjet e dhunshme gjatë protestës, Luarasi tha se shteti ka reaguar duke shkarkuar zinxhirin komandues të policisë në Vlorë dhe duke revokuar licencat e disa firmave private të sigurisë të përfshira në incident.
“Duhet të shmangim emocionet dhe të shohim situatën me qetësi. Ka një organizim të mirë dhe të financuar të protestës,” shtoi ajo, duke theksuar se protestat janë legjitime në demokraci, por duhet të bazohen në fakte dhe të mbeten brenda kornizës ligjore.