Mjekësia shqiptare ka pësuar një humbje të madhe me ndarjen nga jeta të mjekut të njohur pediatër dhe neonatolog, Edi Tushe. Lajmi i hidhur u bë publik mbrëmjen e së hënës nga klinika ku ai ushtronte profesionin, përmes një mesazhi prekës kushtuar figurës dhe kontributit të tij.
Për dekada me radhë, doktor Edi Tushe iu përkushtua me profesionalizëm dhe humanizëm kujdesit ndaj fëmijëve, duke qenë pranë mijëra familjeve shqiptare. Përmes punës së tij të palodhur, ai fitoi respektin dhe vlerësimin e kolegëve, pacientëve dhe gjithë komunitetit mjekësor.
Veprimtaria e tij la gjurmë të rëndësishme edhe në zhvillimin e neonatologjisë në Shqipëri. Krahas angazhimit si mjek, ai dha një kontribut të çmuar në formimin e brezave të rinj të profesionistëve të shëndetësisë, duke ndarë përvojën dhe njohuritë e tij si pedagog.
Ndarja e tij nga jeta lë pas një boshllëk të madh në mjekësinë shqiptare dhe në zemrat e të gjithë atyre që patën fatin ta njohin dhe të punojnë me të.
