Kryeministri Edi Rama, gjatë fjalimit të tij në Asamblenë e Përgjithshme të OKB-së në New York, ka ngritur shqetësimin për ndikimin e Inteligjencës Artificiale dhe platformave digjitale në demokraci.
Rama u ndal te ajo që e quajti “Revolucioni Flamingo”, duke e paraqitur si shembull të mënyrës se si lajmet e rreme dhe narrativat e fabrikuara mund të ndikojnë te perceptimi i qytetarëve dhe të nxisin reagime në shoqëri.
Sipas kryeministrit, përmes algoritmeve dhe shpërndarjes së personalizuar, i njëjti pretendim i rremë mund t’u paraqitet njerëzve në forma të ndryshme, duke shfrytëzuar frikën, bindjet dhe emocionet e tyre.
Ai pretendoi se në rastin e përmendur ishte përhapur një histori për një pushtim izraelit të bregdetit shqiptar, ngjarje që, sipas tij, nuk kishte ndodhur. Rama argumentoi se narrativa të tilla mund të ndikojnë edhe në mobilizimin e qytetarëve dhe në mënyrën se si ata i kuptojnë zhvillimet politike.
Gjatë fjalimit, kreu i qeverisë theksoi se kërcënimi për demokracinë nuk lidhet vetëm me censurën, por edhe me fuqinë për të shpërndarë dhe amplifikuar përmbajtje në mënyrë masive e të fshehtë.
“E drejta për të folur është universale, por nuk ekziston një e drejtë universale për shtrirje anonime, të pakufizuar dhe të amplifikuar artificialisht”, u shpreh Rama.
Ai kërkoi më shumë transparencë për mënyrën se si krijohen dhe shpërndahen mesazhet në internet, duke ngritur pyetje mbi autorët e përmbajtjeve, financimin e tyre dhe rolin e algoritmeve në përhapjen e informacionit.
Sipas Ramës, qytetarët duhet të kenë mundësi të kuptojnë nëse përmbajtjet që shohin janë autentike, të koordinuara apo pjesë e përpjekjeve për të ndikuar në opinionin publik.