Lajda Porja paralajmëron stuhi dhe temperatura ekstreme: Vjeshta pritet të jetë më problematike
Meteorologia e njohur Lajda Porja ka bërë një parashikim të motit për javët dhe muajt në vijim, duke paralajmëruar se temperaturat e larta të kësaj vere mund të pasohen nga fenomene të forta atmosferike gjatë vjeshtës.
Sipas saj, Shqipëria do të përjetojë ditë me temperatura shumë të larta, që gjatë kësaj jave do të arrijnë deri në 37-38 gradë Celsius, ndërsa në disa zona të izoluara termometri mund të shënojë edhe 39 gradë.
Porja theksoi se periudhat e gjata me vapë krijojnë kushte për stuhi të forta dhe reshje intensive në muajt e vjeshtës, veçanërisht gjatë shtatorit, tetorit dhe nëntorit.
Sipas meteorologes, zonat më të rrezikuara do të jenë kryesisht ato lindore dhe malore të vendit, duke përfshirë Tiranën, Elbasanin, Librazhdin, Korçën dhe pjesën juglindore. Këto rajone mund të përballen me stuhi ere, reshje të dendura shiu dhe episode breshëri që mund të shkaktojnë dëme në bujqësi dhe infrastrukturë.
Ndërkohë, vija bregdetare pritet të jetë më e qëndrueshme, megjithëse edhe aty nuk përjashtohen rrebeshe të forta afatshkurtra, të cilat mund të zgjasin nga 30 deri në 40 minuta.
Meteorologia paralajmëroi gjithashtu se reshjet intensive pas një periudhe të gjatë thatësire mund të sjellin përmbytje të përkohshme, pasi toka e tharë nuk arrin të përthithë shpejt sasi të mëdha uji. Sipas saj, zonat malore mbeten më të ekspozuara ndaj rrëshqitjeve të dherave dhe fenomeneve të tjera ekstreme.
Për ditët në vijim, temperaturat më të larta pritet të regjistrohen në disa zona të Shqipërisë qendrore dhe jugore, ndërsa në rajonet malore do të ketë rrebeshe lokale gjatë orëve të pasdites.
Ekspertët këshillojnë qytetarët të tregojnë kujdes gjatë periudhave me temperatura të larta dhe të ndjekin njoftimet zyrtare për ndryshimet e motit dhe fenomenet ekstreme atmosferike.
Be First to Comment