Qeveria miraton planin e ri për Garancinë Rinore, më shumë mundësi punësimi për të rinjtë
Këshilli i Ministrave ka miratuar një vendim të ri për zgjerimin e programit “Garancia Rinore”, një nismë që synon të ndihmojë të rinjtë të gjejnë punë, trajnim profesional, praktikë pune ose mundësi arsimimi në një kohë sa më të shkurtër pas përfundimit të shkollës ose humbjes së vendit të punës.
Vendimi parashikon zëvendësimin e Planit të Zbatimit 2023-2025 me një plan të ri trevjeçar për periudhën 2026-2028, me synimin për të rritur mbështetjen ndaj të rinjve dhe për të lehtësuar integrimin e tyre në tregun e punës.
Ministrja e Ekonomisë dhe Inovacionit, Delina Ibrahimaj, u shpreh se programi do t’u ofrojë të rinjve mundësi konkrete për aftësim profesional, ndërmjetësim për punësim dhe pjesëmarrje në trajnime të ndryshme.
“Garancia Rinore është një instrument i rëndësishëm për të rinjtë që duan të punësohen. Ata që nuk kanë aftësitë e nevojshme do të trajnohen dhe do të mbështeten për të gjetur një vend pune”, deklaroi Ibrahimaj.
Në zbatimin e planit të ri do të përfshihen disa institucione qendrore dhe vendore, përfshirë ministritë kryesore, Agjencinë Kombëtare të Punësimit dhe Aftësive, Agjencinë Kombëtare të Rinisë, INSTAT-in dhe njësitë e vetëqeverisjes vendore.
Përmes kësaj nisme, qeveria synon të ulë papunësinë tek të rinjtë, të forcojë aftësitë profesionale dhe të krijojë më shumë mundësi për përfshirjen e tyre në tregun e punës, në përputhje me objektivat e Strategjisë Kombëtare të Punësimit dhe Aftësive 2023-2030.