Tronditëse! E reja humb jetën, në pranga kushëriri 22-vjeçar

Një ngjarje e rëndë ka tronditur Long Islandin në Shtetet e Bashkuara, ku një 22-vjeçar me origjinë nga El Salvadori akuzohet për vrasjen e dy grave brenda një harku të shkurtër kohor.

Sipas autoriteteve amerikane, Ronnie Yahir Alvarenga Rivera dyshohet se kreu fillimisht vrasjen e fqinjës së tij, 57-vjeçares Raquel Hernandez Castillo. Hetimet paraprake tregojnë se ai ishte irrituar nga zhurmat që, sipas tij, vinin nga apartamenti i gruas.

Prokurorja e Qarkut Nassau, Ann Donnelly, bëri të ditur se i dyshuari u kishte deklaruar hetuesve se zhurma e takave të larta dhe bisedat e gruas në telefon e shqetësonin vazhdimisht. Sipas akuzës, më 30 prill ai e sulmoi me thikë, duke i shkaktuar plagë të shumta fatale.

Autoritetet thonë se pas këtij krimi, Rivera kishte menduar se arrestimi ishte i pashmangshëm dhe më pas dyshohet se kreu një tjetër sulm vdekjeprurës.

Viktima e dytë ishte 42-vjeçarja Ana Maria de Águila Córdova, nënë e tre fëmijëve dhe kolege e tij në një restorant. Sipas hetuesve, ai e kishte pritur pranë vendit të punës dhe e sulmoi sapo ajo doli jashtë për të hedhur mbeturinat pas mesnate, më 1 maj.

Sipas dosjes hetimore, mes tyre kishte pasur mosmarrëveshje të mëparshme dhe i dyshuari ishte ndier i fyer nga sjellja e saj. Gruaja mori plagë të shumta me thikë dhe humbi jetën si pasojë e dëmtimeve.

Pas ngjarjes së dytë, Rivera telefonoi vetë policinë dhe raportoi krimin. Mediat amerikane raportojnë se ai u tha autoriteteve se kishte vrarë një person.

Raportohet gjithashtu se 22-vjeçari kishte probleme të shëndetit mendor, megjithëse autoritetet nuk kanë dhënë detaje zyrtare mbi gjendjen e tij. Ai kishte hyrë në SHBA në vitin 2016, kur ishte 12 vjeç.

Të martën, Rivera u paraqit para gjykatës, ku deklaroi se nuk i pranon akuzat për vrasje të shkallës së parë dhe të dytë, si edhe akuzat e tjera që lidhen me ngjarjet.

Rasti ka shkaktuar reagime të shumta në komunitetin lokal dhe ka rikthyer diskutimet mbi emigracionin e paligjshëm, sigurinë publike dhe trajtimin e personave me probleme të shëndetit mendor në Shtetet e Bashkuara. Hetimet vijojnë.