Trump i bën thirrje Iranit: Kthehuni në negociata dhe arrini një marrëveshje

Presidenti i Shteteve të Bashkuara, Donald Trump, ka reaguar pas sulmeve me raketa të Iranit ndaj Izraelit, duke i kërkuar Teheranit të rikthehet në tryezën e negociatave dhe të shmangë përshkallëzimin e mëtejshëm të tensioneve.

Në një intervistë për Fox News, Trump u shpreh se zhvillimet e fundit mund të ndikojnë negativisht në përpjekjet diplomatike që ishin pranë finalizimit.

“Sapo ishim shumë afër një marrëveshjeje. Kishte pritshmëri që ajo të përmbyllej brenda javës së ardhshme, por ngjarjet e fundit e komplikojnë situatën”, tha presidenti amerikan.

Ai i bëri thirrje Iranit të ndalojë veprimet ushtarake dhe të rikthehet në dialog për të arritur një zgjidhje diplomatike.

Ndërkohë, sipas raportimeve të medias amerikane Axios, Trump ka deklaruar se do të zhvillojë një bisedë me kryeministrin izraelit Benjamin Netanyahu, duke i kërkuar që të shmangë një kundërpërgjigje ushtarake ndaj Iranit.

Presidenti amerikan komentoi gjithashtu edhe sulmet izraelite të kryera në Bejrut, duke theksuar se nuk ishte i kënaqur me zhvillimet që çuan në rritjen e tensioneve në rajon.

Deklaratat e Trump vijnë në një moment kritik për Lindjen e Mesme, ku komuniteti ndërkombëtar po kërkon uljen e tensioneve dhe rikthimin e palëve në rrugën e diplomacisë.