Një aksident i rëndë ajror ka tronditur Francën këtë të diel, ku 11 persona kanë humbur jetën pas rrëzimit të një aeroplani civil në zonën e Tomblaine, në verilindje të vendit.
Sipas autoriteteve, aeroplani i përkiste një shkolle parashutizmi dhe ishte nisur nga aeroporti Nancy-Essey për një fluturim stërvitor. Pak minuta pas ngritjes, mjeti ajror humbi kontrollin dhe u rrëzua, duke shkaktuar vdekjen e të gjithë personave që ndodheshin në bord.
Raportimet paraprake bëjnë të ditur se mes viktimave janë piloti, pesë studentë të shkollës së parashutizmit dhe pesë instruktorë me përvojë. Shkaqet e aksidentit ende nuk janë bërë të ditura, ndërsa autoritetet kanë nisur një hetim për të zbardhur nëse rrëzimi u shkaktua nga një defekt teknik, gabim njerëzor apo faktorë të tjerë.
Menjëherë pas ngjarjes, në vendin e aksidentit mbërritën forca të shumta policie, zjarrfikës dhe ekipe të emergjencës, të cilat siguruan zonën dhe nisën procedurat hetimore. Autoritetet u kanë bërë thirrje qytetarëve të shmangin lëvizjet pranë vendit të ngjarjes, në mënyrë që të mos pengojnë punën e ekipeve të specializuara.
Ndërkohë, ministri i Brendshëm i Francës është nisur drejt Tomblaine për të ndjekur nga afër situatën dhe për t’u koordinuar me autoritetet lokale lidhur me hetimet për këtë tragjedi ajrore.
Be First to Comment