Tragjedi në rrugë: Përplaset me makinën e ndalur në semafor, 2 të vdekur dhe 1 i plagosur

Dy persona humbën jetën dhe një tjetër mbeti i plagosur si pasojë e një aksidenti të rëndë që ndodhi këtë të diel në Barcelonë.

Sipas autoriteteve, drejtuesi i njërës prej makinave ishte denoncuar pak minuta para përplasjes nga punonjësit e një parkingu për shkak të mënyrës së rrezikshme të drejtimit. Pas njoftimit, policia u vu në ndjekje të automjetit.

Në përpjekje për t’iu shmangur efektivëve, shoferi humbi kontrollin e mjetit dhe u përplas me një automjet që ishte ndalur në semafor. Si pasojë e goditjes së fortë, të dy drejtuesit e mjeteve humbën jetën në vendngjarje.

Në vendin e aksidentit ndërhynë menjëherë ekipet e zjarrfikësve, të cilët nxorën nga automjeti një person të plagosur. Ai u transportua me urgjencë në spital për të marrë ndihmën mjekësore.

Hetimet për zbardhjen e plotë të rrethanave të aksidentit vijojnë, ndërsa autoritetet presin rezultatet e autopsisë dhe analizave toksikologjike për të përcaktuar nëse shoferi kishte konsumuar substanca të ndaluara ose nëse vuante nga ndonjë problem shëndetësor që mund të ketë ndikuar në ngjarje.